Meldeplikt til Arbeidstilsynet og politi ved alvorlege arbeidsulukker

Ved alvorlege arbeidsulukker som fører til død eller alvorleg skade må arbeidsgivar straks varsle Arbeidstilsynet og politiet. Etter det første telefonvarselet skal arbeidsgivar stadfeste varselet skriftleg til Arbeidstilsynet. Verneombodet skal ha kopi av stadfestinga.

Meldeplikt til Nav ved yrkesskade og yrkessjukdom

Det er di plikt som arbeidsgivar å melde til Nav snarast mogleg når ein arbeidstakar får yrkesskade eller yrkessjukdom. Med yrkesskade meiner ein personskade, sjukdom eller dødsfall som følgje av arbeidsulukke. Melding skal sendast også når ein er i tvil om skaden eller sjukdomen kan gje rett til ytingar. Melding skal uansett sendast dersom Nav eller arbeidstakaren ønskjer det. Er du frilansar eller sjølvstendig næringsdrivande må du sjølv melde skaden eller sjukdomen.

Dersom arbeidsgivar ikkje melder yrkesskade

Dersom arbeidsgivaren unnlèt å melde ein yrkesskade eller yrkessjukdom til Nav, kan arbeidstakaren gjere dette sjølv. Arbeidstakaren bør også sende skademelding til arbeidsgivaren sitt forsikringsselskap snarast mogleg.

Rett til yrkesskadedekning kan falle bort dersom yrkesskaden eller yrkessjukdomen ikkje er meld innan eitt år etter at arbeidsulukka skjedde, eller den meldepliktige blei klar over årsaka til sjukdomen. Arbeidsgivarar som ikkje melder yrkesskade eller yrkessjukdom kan straffast med bøter.