Formålet med opplæring

Formålet med opplæring er å redusere risiko og belastningar i arbeidet, og å fremme eit helsefremmande og meiningsfylt arbeidsmiljø. Opplæringa skal bidra til å forhindre arbeidsulykker, skadar og sjukdom og  fremme produktivitet. 

Tilpassa opplæring

Arbeidstakarane skal bli gjort kjente med aktuelle forskrifter, interne prosedyrar og rutinar, sikkerheitsreglar, beredskapsplanar og få opplæring i bruk av personleg verneutstyr. Opplæringa skal vere tilpassa den enkelte sitt behov, arbeidsoppgåver og arbeidet sin art. Arbeidsgivar må vurdere behovet for opplæring konkret i kvart enkelt tilfelle, basert på arbeidstakaren si formelle utdanning, erfaring og personlege føresetnader. Opplæringa skal bli gitt på eit språk arbeidstakarane forstår, og arbeidsgivar må forsikre seg om at arbeidstakarane har fått nødvendig kunnskap og ferdigheiter gjennom opplæringa. Det må bli tatt særleg omsyn til at unge arbeidstakarar manglar arbeidserfaring og ikkje alltid er oppmerksame på eksisterande og potensiell risiko.

Arbeidsoppgåver med særskilte opplæringskrav 

Ved bruk av maskiner og utstyr som kan føre til ulykker eller skader, skal arbeidsgivar sørge for at arbeidstakaren har dokumentert kunnskap om korrekt bruk av utstyret. Dette inneber at opplæringa må vere skriftleg dokumentert, og arbeidstakaren skal få eit kompetansebevis etter gjennomført opplæring.
Ein del arbeidsoppgåver og arbeidsområde har særskilte krav til opplæring. Her skal arbeidsgivar sørge for opplæring i samsvar med krava i forskrift om utføring av arbeid. 

Følgande arbeidsoppgåver har særskilte opplæringskrav: 

• arbeid med kjemikaliar
• arbeid med asbest
• varmt arbeid
• arbeid med risiko for å bli utsett for biologiske faktorar
• arbeid ved avløpsanlegg
• arbeid med arbeidsutstyr som krev særskilt varsemd
• vedlikehald av arbeidsutstyr
• arbeid med risiko for å bli utsett for helseskadeleg støy eller mekaniske vibrasjonar
• arbeid med risiko for å bli utsett for kunstig optisk stråling
• arbeid med risiko for å bli utsett for elektromagnetisk felt
• montering, demontering, endring og kontroll av stillas
• sikkerheitsskilting og signalgiving
• ergonomisk belastande arbeid
• arbeid som kan medføre risiko for å bli utsett for vald og trussel om vald
• arbeid med driftskontroll og sikkerheitsovervaking (kontrollrom)
• arbeid under vatn eller auka omgivande trykk